(1)
அயிலாரும் அம்பதனால் புர மூன்றெய்து
குயிலாரும் மென்மொழியாள் ஒருகூறாகி
மயிலாரும் மல்கிய சோலை மணஞ்சேரிப்
பயில்வானைப் பற்றி நின்றார்க்கு இல்லை பாவமே
(2)
விதியானை, விண்ணவர் தாம் தொழுதேத்திய
நெதியானை, நீள்சடை மேல் நிகழ்வித்த வான்
மதியானை, வண்பொழில் சூழ்ந்த மணஞ்சேரிப்
பதியானைப் பாடவல்லார் வினை பாறுமே
(3)
எய்ப்பானார்க்கு இன்புறு தேன் அளித்தூறிய
இப்பாலாய் எனையும் ஆள உரியானை
வைப்பான மாடங்கள் சூழ்ந்த மணஞ்சேரி
மெய்ப்பானை மேவி நின்றார் வினை வீடுமே
(4)
விடையானை, மேலுலகேழும் இப்பாரெலாம்
உடையானை, ஊழிதோறு ஊழி உளதாய
படையானைப், பண்ணிசை பாடு மணஞ்சேரி
அடைவானை அடைய வல்லார்க்கு இல்லை அல்லலே
(5)
எறியார்பூங் கொன்றையினோடும் இளமத்தம்
வெறியாரும் செஞ்சடையார மிலைத்தானை
மறியாரும் கையுடையானை மணஞ்சேரிச்
செறிவானைச் செப்பவல்லார்க்கிடர் சேராவே
(6)
மொழியானை முன்னொரு நான்மறை ஆறங்கம்
பழியாமைப் பண்ணிசையான பகர்வானை
வழியானை வானவரேத்து மணஞ்சேரி
இழியாமை ஏத்தவல்லார்க்கு எய்தும் இன்பமே
(7)
எண்ணானை, எண்ணமர் சீர் இமையோர்கட்குக்
கண்ணானைக், கண்ணொரு மூன்றும் உடையானை
மண்ணானை, மாவயல் சூழ்ந்த மணஞ்சேரிப்
பெண்ணானைப் பேச நின்றார் பெரியோர்களே
(8)
எடுத்தானை எழில்முடி எட்டும்இரண்டும் தோள்
கெடுத்தானைக், கேடிலாச் செம்மை உடையானை
மடுத்தார வண்டிசை பாடு மணஞ்சேரி
பிடித்தாரப் பேணவல்லார் பெரியோர்களே
(9)
சொல்லானைத், தோற்றம் கண்டானும் நெடுமாலும்
கல்லானைக், கற்றன சொல்லித் தொழுதோங்க
வல்லார்நன் மாதவரேத்து மணஞ்சேரி
எல்லாமாம் எம்பெருமான் கழலேத்துமே
(10)
சற்றேயும் தாமறிவில் சமண் சாக்கியர்
சொற்றேயும் வண்ணமொர் செம்மை உடையானை
வற்றாத வாவிகள் சூழ்ந்த மணஞ்சேரி
பற்றாக வாழ்பவர் மேல் வினை பற்றாவே
(11)
கண்ணாரும் காழியர்கோன் கருத்தார்வித்த
தண்ணார்சீர் ஞானசம்பந்தன் தமிழ்மாலை
மண்ணாரும் மாவயல் சூழ்ந்த மணஞ்சேரி
பண்ணாரப் பாட வல்லார்க்கில்லை பாவமே
தேவாரத் திருப்பதிகங்களுக்கான பாராயண வலைத்தளம்:
சைவ சமயத்திற்கு அளப்பரிய தொண்டாற்றி வரும் பிரதான வலைத்தளங்களில், தேவாரம் உள்ளிட்ட பன்னிரு திருமுறைகளின் மூலம் பேணிப் பாதுகாக்கப் பெற்று வருக...
