(குறிப்பு: திருஞானசம்பந்தரால் மட்டுமே பாடல் பெற்றுள்ள திருத்தலம்)
(சம்பந்தர் தேவாரம்):
(1)
மருந்து வேண்டில்இவை, மந்திரங்கள்இவை
புரிந்து கேட்கப்படும் புண்ணியங்கள்இவை
திருந்துதேவன்குடித் தேவர் தேவெய்திய
அருந்தவத்தோர் தொழும் அடிகள் வேடங்களே
(2)
வீதி போக்காவன, வினையை வீட்டுவ்வன
ஓதியோர்க்கு அகப்படாப் பொருளை ஓர்விப்பன
தீதில் தேவன்குடித் தேவர் தேவெய்திய
ஆதி அந்தம்இலா அடிகள் வேடங்களே
(3)
மானம் ஆக்குவ்வன, மாசு நீக்குவ்வன
வானைஉள்கச் செலும் வழிகள் காட்டுவ்வன
தேனும் வண்டும் இசை பாடும் தேவன்குடி
ஆனஞ்சாடும் முடி அடிகள் வேடங்களே
(4)
செவிகள் ஆர்விப்பன, சிந்தையுள் சேர்வன
கவிகள் பாடுவ்வன, கண் குளிர்விப்பன
புவிகள் பொங்கப் புனல் பாயும் தேவன்குடி
அவிகள் உய்க்கப்படும் அடிகள் வேடங்களே
(5)
விண்ணுலாவும் நெறி, வீடு காட்டும் நெறி
மண்ணுலாவும் நெறி, மயக்கம் தீர்க்கும் நெறி
தெண்ணிலா வெண்மதி தீண்டு தேவன்குடி
அண்ணல் ஆனேறுடை அடிகள் வேடங்களே
(6)
பங்கமென்னப் படர் பழிகள் என்னப்படா
புங்கமென்னப் படர் புகழ்கள் என்னப்படும்
திங்கள் தோயும் பொழில் தீண்டு தேவன்குடி
அங்கம்ஆறும் சொன்ன அடிகள் வேடங்களே
(7)
கரைதல் ஒன்றும்இலை கருதவல்லார் தமக்கு
உரையில் ஊனம்இலை உலகினில் மன்னுவர்
திரைகள் பொங்கப் புனல்பாயும் தேவன்குடி
அரையில் வெண்கோவணத்தடிகள் வேடங்களே
(8)
உலகமுட்கும் திறல்உடை அரக்கன் வலி
விலகு பூதக்கணம் வெருட்டும் வேடத்தின
திலகமாரும் பொழில் சூழ்ந்த தேவன்குடி
அலர் தயங்கும்முடி அடிகள் வேடங்களே
(9)
துளக்கம் இல்லாதன, தூய தோற்றத்தன
விளக்கம் ஆக்குவ்வன, வெறி வண்டாரும் பொழில்
திளைக்கும் தேவன்குடித் திசைமுகனோடு மால்
அளக்க ஒண்ணா வண்ணத்தடிகள் வேடங்களே
(10)
செருமரு தண்துவர்த் தேரர் அமணாதர்கள்
உருமருவப் படாத் தொழும்பர்தம் உரைகொளேல்
திருமருவும் பொய்கை சூழ்ந்த தேவன்குடி
அருமருந்தாவன அடிகள் வேடங்களே
(11)
சேடர் தேவன்குடித் தேவர்தேவன் தனை
மாடம் ஓங்கும் பொழில்மல்கு தண் காழியான்
நாடவல்ல தமிழ் ஞானசம்பந்தன
பாடல் பத்தும் வல்லார்க்கில்லையாம் பாவமே
தேவாரத் திருப்பதிகங்களுக்கான பாராயண வலைத்தளம்:
சைவ சமயத்திற்கு அளப்பரிய தொண்டாற்றி வரும் பிரதான வலைத்தளங்களில், தேவாரம் உள்ளிட்ட பன்னிரு திருமுறைகளின் மூலம் பேணிப் பாதுகாக்கப் பெற்று வருக...
