(சம்பந்தர் தேவாரம்):

(சுந்தரர் தேவாரம்):

<– சோழ நாடு (காவிரி வடகரை)

திரைதரு பவளமும் சீர்திகழ் வயிரமும்
கரைதரும் அகிலொடு கனவளை புகுதரும்
வரைவிலால் எயிலெய்த மயேந்திரப் பள்ளியுள்
அரவரை அழகனை அடியிணை பணிமினே

(2)
கொண்டல்சேர் கோபுரம் கோலமார் மாளிகை
கண்டலும் கைதையும் கமலமார் வாவியும்
வண்டுலாம் பொழிலணி மயேந்திரப் பள்ளியில்
செண்டுசேர் விடையினான் திருந்தடி பணிமினே

(3)
கோங்கிள வேங்கையும் கொழுமலர்ப் புன்னையும்
தாங்குதேன் கொன்றையும் தகுமலர்க் குரவமும்
மாங்கரும்பும் வயல் மயேந்திரப் பள்ளியுள்
ஆங்கிருந்தவன் கழலடியிணை பணிமினே

(4)
வங்கமார் சேணுயர் வருகுறியால் மிகு
சங்கமார் ஒலிஅகில் தருபுகை கமழ்தரு
மங்கையோர் பங்கினன் மயேந்திரப் பள்ளியுள்
எங்கள் நாயகன் தனது இணையடி பணிமினே

(5)
நித்திலத் தொகைபல நிரைதரு மலரெனச்
சித்திரப் புணரி சேர்த்திடத் திகழ்ந்திருந்தவன்
மைத்திகழ் கண்டனன் மயேந்திரப் பள்ளியுள்
கைத்தல மழுவனைக் கண்டடி பணிமினே

(6)
சந்திரன் கதிரவன் தகுபுகழ் அயனொடும்
இந்திரன் வழிபட இருந்தஎம் இறையவன்
மந்திர மறைவளர் மயேந்திரப் பள்ளியுள்
அந்தமில் அழகனை அடிபணிந்துய்ம்மினே

(7)
சடைமுடி முனிவர்கள் சமைவொடும் வழிபட
நடநவில் புரிவினன் அறவணி மலரொடு
படர்சடை மதியினன் மயேந்திரப் பள்ளியுள்
அடல்விடை உடையவன் அடிபணிந்துய்ம்மினே

(8)
சிரம் ஒருபதுமுடைச் செருவலி அரக்கனைக்
கரம் இருபதுமிற கனவரை அடர்த்தவன்
மரவமர் பூம்பொழில் மயேந்திரப் பள்ளியுள்
அரவமர் சடையனை அடிபணிந்துய்ம்மினே

(9)
நாகணைத் துயில்பவன், நலமிகு மலரவன்
ஆகணைந்தவர் கழல் அணையவும் பெறுகிலர்
மாகணைந்தலர் பொழில் மயேந்திரப் பள்ளியுள்
யோகணைந்தவன் கழல் உணர்ந்திருந்துய்ம்மினே

(10)
உடை துறந்தவர்களும், உடைதுவர் உடையரும்
படுபழி உடையவர் பகர்வன விடுமினீர்
மடைவளர் வயலணி மயேந்திரப் பள்ளியுள்
இடமுடை ஈசனை இணையடி பணிமினே

(11)
வம்புலாம் பொழிலணி மயேந்திரப் பள்ளியுள்
நம்பனார் கழலடி ஞானசம்பந்தன் சொல்
நம்பரம் இதுவென நாவினால் நவில்பவர்
உம்பரார் எதிர்கொள உயர்பதி அணைவரே

(சம்பந்தர் தேவாரம்):