(1)
கருநட்ட கண்டனை, அண்டத் தலைவனைக் கற்பகத்தைச்
செருநட்ட மும்மதில் எய்ய வல்லானைச், செந்தீ முழங்கத்
திருநட்டம் ஆடியைத், தில்லைக்கிறையைச், சிற்றம்பலத்துப்
பெருநட்டம் ஆடியை, வானவர் கோனென்று வாழ்த்துவனே
(2)
ஒன்றியிருந்து நினைமின்கள் உந்தமக்கு ஊனமில்லை
கன்றிய காலனைக் காலால் கடிந்தான் அடியவற்காச்
சென்று தொழுமின்கள் தில்லையுள் சிற்றம்பலத்து நட்டம்
என்று வந்தாய் என்னும் எம்பெருமான்தன் திருக்குறிப்பே
(3)
கல்மனவீர் கழியும் கருத்தே சொல்லிக் காண்பதென்னே
நல்மனவர் நவில் தில்லையுள் சிற்றம்பலத்து நட்டம்
பொன் மலையில் வெள்ளிக் குன்றது போலப் பொலிந்திலங்கி
என்மனமே ஒன்றிப் புக்கனன் போந்த சுவடில்லையே
(4)
குனித்த புருவமும் கொவ்வைச்செவ்வாயில் குமிண்சிரிப்பும்
பனித்த சடையும் பவளம்போல் மேனியில் பால்வெண்ணீறும்
இனித்தமுடைய எடுத்த பொற்பாதமும் காணப்பெற்றால்
மனித்தப் பிறவியும் வேண்டுவதே இந்த மாநிலத்தே
(5)
வாய்த்தது நந்தமக்கீதோர் பிறவி மதித்திடுமின்
பார்த்தற்குப் பாசுபதம்அருள் செய்தவன் பத்தருள்ளீர்
கோத்தன்று முப்புரம் தீவளைத்தான், தில்லை அம்பலத்துக்
கூத்தனுக்கு ஆட்பட்டிருப்பதன்றோ நந்தங் கூழைமையே
(6)
பூத்தன பொற்சடை பொன்போன் மிளிரப், புரிகணங்கள்
ஆர்த்தன, கொட்டி அரித்தன பல்குறள் பூதகணம்
தேத்தென என்றிசை வண்டுகள் பாடு சிற்றம்பலத்துக்
கூத்தனில் கூத்துவல்லார் உளரோ எந்தன் கோல்வளைக்கே
(7)
முடிகொண்ட மத்தமும், முக்கண்ணின் நோக்கும், முறுவலிப்பும்
துடிகொண்ட கையும், துதைந்த வெண்ணீறும், சுரிகுழலாள்
படிகொண்ட பாகமும், பாய்புலித் தோலும், என் பாவிநெஞ்சில்
குடிகொண்டவா தில்லை அம்பலக் கூத்தன் குரைகழலே
(8)
படைக்கலமாக உன் நாமத்து எழுத்தஞ்சென் நாவில் கொண்டேன்
இடைக்கலம் அல்லேன், எழுபிறப்பும் உனக்காட் செய்கின்றேன்
துடைக்கினும் போகேன், தொழுது வணங்கித் தூநீறணிந்துன்
அடைக்கலம் கண்டாய், அணிதில்லைச் சிற்றம்பலத்தரனே
(9)
பொன்னொத்த மேனிமேல் வெண்ணீறணிந்து, புரிசடைகண்
மின்னொத்திலங்கப், பலி தேர்ந்துழலும் விடங்கர் வேடச்
சின்னத்தினான், மலி தில்லையுள் சிற்றம்பலத்து நட்டம்
என்அத்தன் ஆடல் கண்டின்புற்றதால் இவ்விருநிலமே
(10)
சாட எடுத்தது தக்கன்தன் வேள்வியில் சந்திரனை
வீட எடுத்தது காலனை, நாரணன் நான்முகனும்
தேட எடுத்தது தில்லையுள் சிற்றம்பலத்து நட்டம்
ஆட எடுத்திட்ட பாதமன்றோ நம்மை ஆட்கொண்டதே
