(குறிப்பு: திருஞானசம்பந்தரால் மட்டுமே பாடல் பெற்றுள்ள திருத்தலம்)
(சம்பந்தர் தேவாரம்):
(1)
பொடிகள்பூசிப் பலதொண்டர் கூடிப் புலர்காலையே
அடிகளாரத் தொழுதேத்த நின்ற அழகன் இடம்
கொடிகள்ஓங்கிக் குலவும் விழவார் திலதைப்பதி
வடிகொள் சோலைம் மலர் மணம்கமழும் மதிமுத்தமே
(2)
தொண்டர் மிண்டிப் புகைவிம்மு சாந்தும்கமழ் துணையலும்
கொண்டு கண்டார் குறிப்புணர நின்ற குழகன் இடம்
தெண்திரைப் பூம்புனல் அரிசில் சூழ்ந்த திலதைப்பதி
வண்டு கெண்டுற்று இசைபயிலும் சோலைம் மதிமுத்தமே
(3)
அடலுள்ஏறு உய்த்துகந்தான், அடியார் அமரர்தொழக்
கடலுள் நஞ்சமுதாக உண்ட கடவுள் இடம்
திடலடங்கச் செழும்கழனி சூழ்ந்த திலதைப்பதி
மடலுள் வாழைக்கனி தேன் பிலிற்றும் மதிமுத்தமே
(4)
கங்கை திங்கள் வன்னிதுன் எருக்கின்னொடு கூவிளம்
வெங்கண் நாகம் விரிசடையில் வைத்த விகிர்தன் இடம்
செங்கயல்பாய் புனலரிசில் சூழ்ந்த திலதைப்பதி
மங்குல் தோயும் பொழில் சூழ்ந்தழகார் மதிமுத்தமே
(5)
புரவியேழும் மணிபூண்டு இயங்கும் கொடித் தேரினான்
பரவிநின்று வழிபாடு செய்யும் பரமேட்டி ஊர்
விரவிஞாழல் விரிகோங்கு வேங்கை சுர புன்னைகள்
மரவ மவ்வல் மலரும் திலதைம் மதிமுத்தமே
(6)
விண்ணர் வேதம் விரித்தோத வல்லார், ஒருபாகமும்
பெண்ணர், எண்ணார் எயில் செற்றுகந்த பெருமான் இடம்
தெண்ணிலாவின் ஒளிதீண்டு சோலைத் திலதைப்பதி
மண்ணுளார் வந்தருள் பேண நின்றம் மதிமுத்தமே
(7)
ஆறுசூடி அடையார்புரம் செற்றவர், பொற்றொடி
கூறுசேரும் உருவர்க்கிடமாவது கூறுங்கால்
தேறலாரும் பொழில் சூழ்ந்தழகார் திலதைப்பதி
மாறிலாவண் புனல்அரிசில் சூழ்ந்தம் மதிமுத்தமே
(8)
கடுத்துவந்த கனல் மேனியினான், கருவரை தனை
எடுத்தவன் தன் முடிதோள் அடர்த்தார்க்கிடமாவது
புடைக்கொள் பூகத்திளம் பாளை புல்கும் மதுப்பாய வாய்
மடுத்து மந்தி உகளும் திலதைம் மதிமுத்தமே
(9)
படங்கொள் நாகத்தணையானும், பைந்தாமரையின் மிசை
இடங்கொள் நால்வேதனும் ஏத்த நின்ற இறைவன் இடம்
திடங்கொள் நாவின் இசை தொண்டர் பாடும் திலதைப்பதி
மடங்கல் வந்து வழிபாடு செய்யும் மதிமுத்தமே
(10)
புத்தர்தேரர் பொறியில் சமணர்களும் வீறிலாப்
பித்தர் சொன்னம் மொழி கேட்கிலாத பெருமான்இடம்
பத்தர் சித்தர் பணிவுற்றிறைஞ்சும் திலதைப்பதி
மத்தயானை வழிபாடு செய்யும் மதிமுத்தமே
(11)
மந்தமாரும் பொழில் சூழ்திலதைம் மதிமுத்தர் மேல்
கந்தமாரும் கடற்காழி உள்ளான் !தமிழ்ஞானசம்
பந்தன்மாலை பழிதீர நின்றேத்த வல்லார்கள் போய்ச்
சிந்தை செய்வார் சிவன் சேவடி சேர்வது திண்ணமே
தேவாரத் திருப்பதிகங்களுக்கான பாராயண வலைத்தளம்:
சைவ சமயத்திற்கு அளப்பரிய தொண்டாற்றி வரும் பிரதான வலைத்தளங்களில், தேவாரம் உள்ளிட்ட பன்னிரு திருமுறைகளின் மூலம் பேணிப் பாதுகாக்கப் பெற்று வருக...
