(குறிப்பு: அப்பர் சுவாமிகளால் மட்டுமே பாடல் பெற்றுள்ள திருத்தலம்)
(அப்பர் தேவாரம்):
(1)
கடலகம் ஏழினோடும் பவனமும் கலந்த விண்ணும்
உடலகத்துயிரும் பாரும் ஒள்ளழலாகி நின்று
தடமலர்க் கந்தமாலை தண்மதி பகலுமாகி
மடலவிழ் கொன்றைசூடி மன்னும் ஆப்பாடியாரே
(2)
ஆதியும் அறிவுமாகி அறிவினுள் செறிவுமாகிச்
சோதியுள் சுடருமாகித் தூநெறிக்கொருவனாகிப்
பாதியில் பெண்ணுமாகிப் பரவுவார் பாங்கராகி
வேதியர் வாழும் சேய்ஞல் விரும்பும் ஆப்பாடியாரே
(3)
எண்ணுடை இருக்குமாகிm இருக்கினுள் பொருளுமாகிப்
பண்ணொடு பாடல்தன்னைப் பரவுவார் பாங்கராகிக்
கண்ணொரு நெற்றியாகிக் கருதுவார் கருதலாகாப்
பெண்ணொரு பாகமாகிப் பேணும்ஆப்பாடியாரே
(4)
அண்டமார் அமரர் கோமான், ஆதிஎம் அண்ணல் பாதம்
கொண்டவன் குறிப்பினாலே கூப்பினான் தாபரத்தைக்
கண்டவன் தாதை பாய்வான் காலற எறியக் கண்டு
சண்டியார்க்கருள்கள் செய்த தலைவர் ஆப்பாடியாரே
(5)
சிந்தையும் தெளிவுமாகித் தெளிவினுள் சிவமுமாகி
வந்தநற் பயனுமாகி வாள்நுதல் பாகமாகி
மந்தமாம் பொழில்கள் சூழ்ந்த மண்ணித் தென்கரைமேல் மன்னி
அந்தமோடளவிலாத அடிகள் ஆப்பாடியாரே
(6)
வன்னி வாளரவு மத்த மதியமும் ஆறும் சூடி
மின்னிய உருவாம் சோதி மெய்ப்பொருள் பயனுமாகிக்
கன்னியோர் பாகமாகிக் கருதுவார் கருத்துமாகி
இன்னிசை தொண்டர் பாட இருந்த ஆப்பாடியாரே
(7)
உள்ளுமாய்ப் புறமுமாகி உருவுமாய் அருவுமாகி
வெள்ளமாய்க் கரையுமாகி விரிகதிர் ஞாயிறாகிக்
கள்ளமாய்க் கள்ளத்துள்ளார் கருத்துமாய் அருத்தமாகி
அள்ளுவார்க்கள்ளல் செய்திட்டிருந்த ஆப்பாடியாரே
(8)
மயக்கமாய்த் தெளிவுமாகி மால்வரை வளியுமாகித்
தியக்கமாய் ஒருக்கமாகிச் சிந்தையுள் ஒன்றி நின்று
இயக்கமாய் இறுதியாகி எண்திசைக்கிறைவராகி
அயக்கமாய் அடக்கமாய ஐவர் ஆப்பாடியாரே
(9)
ஆரழல் உருவமாகி அண்டமேழ் கடந்த எந்தை
பேரொளி உ ருவினானைப் பிரமனும் மாலும் காணாச்
சீரவை பரவியேத்திச் சென்றடி வணங்குவார்க்குப்
பேரருள் அருளிச் செய்வார் பேணும் ஆப்பாடியாரே
(10)
திண்திறல் அரக்கனோடிச் சீகயிலாயம் தன்னை
எண்திறல் இலனுமாகி எடுத்தலும் ஏழைஅஞ்ச
விண்டிறல் நெரிய ஊன்றி மிகக் கடுத்தலறி வீழப்
பண்திறல் கேட்டுகந்த பரமர் ஆப்பாடியாரே
தேவாரத் திருப்பதிகங்களுக்கான பாராயண வலைத்தளம்:
சைவ சமயத்திற்கு அளப்பரிய தொண்டாற்றி வரும் பிரதான வலைத்தளங்களில், தேவாரம் உள்ளிட்ட பன்னிரு திருமுறைகளின் மூலம் பேணிப் பாதுகாக்கப் பெற்று வருக...
