(1)
பாளையுடைக் கமுகோங்கிப் பன்மாடம் நெருங்கியெங்கும்
வாளையுடைப் புனல் வந்தெறி வாழ்வயல் தில்லை தன்னுள்
ஆளவுடைக் கழல் சிற்றம்பலத்தரன் ஆடல் கண்டால்
பீளையுடைக் கண்களால் பின்னைப் பேய்த்தொண்டர் காண்பதென்னே
(2)
பொருவிடை ஒன்றுடைப் புண்ணிய மூர்த்தி, புலிஅதளன்
உருவுடைய மலைமங்கை மணாளன், உலகுக்கெல்லாம்
திருவுடை அந்தணர் வாழ்கின்ற தில்லைச் சிற்றம்பலவன்
திருவடியைக் கண்ட கண்கொண்டு மற்றினிக் காண்பதென்னே
(3)
தொடுத்த மலரொடு தூபமும் சாந்தும் கொண்டெப்பொழுதும்
அடுத்து வணங்கும் அயனொடு மாலுக்கும் காண்பரியான்
பொடிக் கொண்டணிந்து பொன்னாகிய தில்லைச் சிற்றம்பலவன்
உடுத்த துகில்கண்ட கண்கொண்டு மற்றினிக் காண்பதென்னே
(4)
வைச்ச பொருள் நமக்காகும் என்றெண்ணி நமச்சிவாய
அச்சமொழிந்தேன், அணிதில்லை அம்பலத்தாடுகின்ற
பிச்சன் பிறப்பிலி பேர்நந்தி உந்தியின் மேலசைத்த
கச்சின் அழகு கண்டால் பின்னைக் கண்கொண்டு காண்பதென்னே
(5)
செய்ஞ்ஞின்ற நீல மலர்கின்ற தில்லைச் சிற்றம்பலவன்
மைஞ்ஞின்ற ஒண்கண் மலைமகள் கண்டு மகிழ்ந்து நிற்க
நெய் ஞின்றெரியும் விளக்கொத்த நீல மணிமிடற்றான்
கைஞின்ற ஆடல்கண்டால் பின்னைக் கண்கொண்டு காண்பதென்னே
(6)
ஊனத்தை நீக்கி உலகறிய என்னை ஆட்கொண்டவன்
தேனொத்த எனக்கினியான் தில்லைச் சிற்றம்பலவன் எங்கோன்
வானத்தவர்உய்ய வன்னஞ்சை உண்ட கண்டத்திலங்கும்
ஏனத்தெயிறு கண்டால் பின்னைக் கண்கொண்டு காண்பதென்னே
(7)
தெரித்த கணையால் திரிபுர மூன்றும் செந்தீயில்மூழ்க
எரித்த இறைவன், இமையவர் கோமான், இணையடிகள்
தரித்த மனத்தவர் வாழ்கின்ற தில்லைச் சிற்றம்பலவன்
சிரித்த முகம்கண்ட கண்கொண்டு மற்றினிக் காண்பதென்னே
(8)
சுற்றும் அமரர் சுரபதி நின்திருப்பாதம் அல்லால்
பற்றொன்றிலோம் என்றழைப்பப் பரவையுள் நஞ்சையுண்டான்
செற்றங்கநங்கனைத் தீவிழித்தான், தில்லை அம்பலவன்
நெற்றியில் கண்கண்ட கண்கொண்டு மற்றினிக் காண்பதென்னே
(9)
சித்தத்தெழுந்த செழுங் கமலத்தன்ன சேவடிகள்
வைத்த மனத்தவர் வாழ்கின்ற தில்லைச் சிற்றம்பலவன்
முத்தும் வயிரமும் மாணிக்கம் தன்னுள் விளங்கிய, தூ
மத்த மலர்கண்ட கண்கொண்டு மற்றினிக் காண்பதென்னே
(10)
தருக்கு மிகுத்துத்தன் தோள்வலி உன்னித் தடவரையை
வரைக்கைகளால் எடுத்தார்ப்ப, மலைமகள்கோன் சிரித்து
அரக்கன் மணிமுடி பத்தும் அணிதில்லை அம்பலவன்
நெருக்கி மிதித்த விரல்கண்ட கண்கொண்டு காண்பதென்னே
தேவாரத் திருப்பதிகங்களுக்கான பாராயண வலைத்தளம்:
சைவ சமயத்திற்கு அளப்பரிய தொண்டாற்றி வரும் பிரதான வலைத்தளங்களில், தேவாரம் உள்ளிட்ட பன்னிரு திருமுறைகளின் மூலம் பேணிப் பாதுகாக்கப் பெற்று வருக...
