(1)
அன்னம் பாலிக்கும் தில்லைச் சிற்றம்பலம்
பொன்னம் பாலிக்கும் மேலும்இப்பூமிசை
என்னம் பாலிக்குமாறு கண்டின்புற
இன்னம் பாலிக்குமோ இப்பிறவியே
(2)
அரும்பற்றப்பட ஆய்மலர் கொண்டுநீர்
சுரும்பற்றப்படத் தூவித் தொழுமினோ
கரும்பற்றச் சிலைக் காமனைக் காய்ந்தவன்
பெரும்பற்றப் புலியூர்எம் பிரானையே
(3)
அரிச்சுற்ற வினையால் அடர்ப்புண்டுநீர்
எரிச்சுற்றக் கிடந்தார் என்றயலவர்
சிரிச்சுற்றுப் பல பேசப்படா முனம்
திருச்சிற்றம்பலம் சென்றடைந்துய்ம்மினே
(4)
அல்லல் என்செயும், அருவினை என்செயும்
தொல்லை வல்வினைத் தொந்தம்தான் என்செயும்
தில்லை மாநகர்ச் சிற்றம்பலவனார்க்கு
எல்லையில்லதோர் அடிமை பூண்டேனுக்கே
(5)
ஊனில் ஆவி உயிர்க்கும் பொழுதெலாம்
நான்நிலாவி இருப்பன் என் நாதனைத்
தேன் நிலாவிய சிற்றம்பலவனார்
வான்நிலாவி இருக்கவும் வைப்பரே
(6)
சிட்டர் வானவர் சென்று வரங்கொளும்
சிட்டர் வாழ்தில்லைச் சிற்றம்பலத்துறை
சிட்டன் சேவடி கைதொழச் செல்லும்அச்
சிட்டர் பால்அணுகான் செறுகாலனே
(7)
ஒருத்தனார் உலகங்கட்கொரு சுடர்
திருத்தனார், தில்லைச் சிற்றம்பலவனார்
விருத்தனார், இளையார் விடமுண்டஎம்
அருத்தனார், அடியாரை அறிவரே
(8)
விண் நிறைந்ததோர் வெவ்வழலின்உரு
எண்நிறைந்த இருவர்க்கறிவொணாக்
கண்நிறைந்த கடிபொழில் அம்பலத்து
உள்நிறைந்து நின்றாடும் ஒருவனே
(9)
வில்லை வட்டப்பட வாங்கி அவுணர்தம்
வல்லை வட்டம்மதில் மூன்றுடன் மாய்த்தவன்
தில்லை வட்டந்திசை கைதொழுவார் வினை
ஒல்லை வட்டம் கடந்தோடுதல் உண்மையே
(10)
நாடி நாரணன் நான்முகன் என்றிவர்
தேடியும் திரிந்தும் காணவல்லரோ
மாட மாளிகைசூழ் தில்லை அம்பலத்து
ஆடி பாதமென் நெஞ்சுள் இருக்கவே
(11)
மதுர வாய்மொழி மங்கையோர் பங்கினன்
சதுரன் சிற்றம்பலவன், திருமலை
அதிர ஆர்த்தெடுத்தான் முடி பத்திற
மிதிகொள் சேவடி சென்றடைந்துய்ம்மினே
தேவாரத் திருப்பதிகங்களுக்கான பாராயண வலைத்தளம்:
சைவ சமயத்திற்கு அளப்பரிய தொண்டாற்றி வரும் பிரதான வலைத்தளங்களில், தேவாரம் உள்ளிட்ட பன்னிரு திருமுறைகளின் மூலம் பேணிப் பாதுகாக்கப் பெற்று வருக...
