(1)
பத்தனாய்ப் பாட மாட்டேன் பரமனே பரம யோகீ
எத்தினால் பத்தி செய்கேன் என்னைநீ இகழ வேண்டா
முத்தனே முதல்வா, தில்லை அம்பலத்தாடுகின்ற
அத்தா, உன்ஆடல் காண்பான் அடியனேன் வந்தவாறே
(2)
கருத்தனாய்ப் பாட மாட்டேன், காம்பன தோளி பங்கா
ஒருத்தரால் அறியவொண்ணாத் திருவுரு உடைய சோதீ
திருத்தமாம் தில்லைதன்னுள் திகழ்ந்த சிற்றம்பலத்தே
நிருத்த நான் காண வேண்டி நேர்பட வந்தவாறே
(3)
கேட்டிலேன் கிளைபிரியேன் கேட்குமா கேட்டியாகில்
நாட்டினேன் நிந்தன் பாதம் நடுப்பட நெஞ்சினுள்ளே
மாட்டினீர் வாளை பாயும் மல்கு சிற்றம்பலத்தே
கூட்டமாம் குவிமுலையாள் கூடநீ ஆடுமாறே
(4)
சிந்தையைத் திகைப்பியாதே செறிவுடை அடிமை செய்ய
எந்தைநீ அருளிச் செய்யா யாதுநான் செய்வதென்னே
செந்தியார் வேள்விஓவாத் தில்லைச் சிற்றம்பலத்தே
அந்தியும் பகலும் ஆட அடியிணை அலசும் கொல்லோ
(5)
கண்டவா திரிந்து நாளுன் கருத்தினால் நிந்தன் பாதம்
கொண்டிருந்தாடிப் பாடிக் கூடுவன் குறிப்பினாலே
வண்டு பண்பாடும் சோலை மல்கு சிற்றம்பலத்தே
எண் திசையோரும் ஏத்த இறைவ நீ ஆடுமாறே
(6)
பார்த்திருந்தடியனேனான் பரவுவன் பாடியாடி
மூர்த்தியே என்பன் உன்னை, மூவரின் முதல்வன் என்பன்
ஏத்துவார் இடர்கள் தீர்ப்பாய், தில்லைச் சிற்றம்பலத்துக்
கூத்தாஉன் கூத்துக் காண்பான், கூடநான் வந்தவாறே
(7)
பொய்யினைத் தவிர விட்டுப் புறமலா அடிமை செய்ய
ஐயநீ அருளிச் செய்யா ஆதியே ஆதி மூர்த்தீ
வையகந்தன்னில் மிக்க மல்கு சிற்றம்பலத்தே
பையநுன் ஆடல் காண்பான் பரம நான் வந்தவாறே
(8)
மனத்தினார் திகைத்து நாளும் மாண்பலா நெறிகள் மேலே
கனைப்பரால் என் செய்கேனோ கறையணி கண்டத்தானே
தினைத்தனை வேதம் குன்றாத் தில்லைச் சிற்றம்பலத்தே
அனைத்துநின் இலயம் காண்பான் அடியனேன் வந்தவாறே
(9)
நெஞ்சினைத் தூய்மை செய்து நினைக்குமா நினைப்பியாதே
வஞ்சமே செய்தியாலோ வானவர் தலைவனேநீ
மஞ்சடை சோலைத் தில்லை மல்கு சிற்றம்பலத்தே
அஞ்சொலாள் காண நின்று அழகநீ ஆடுமாறே
(10)
மண்ணுண்ட மாலவனும் மலர்மிசை மன்னினானும்
விண்ணுண்ட திருவுருவம் விரும்பினார் காண மாட்டார்
திண்ணுண்ட திருவே மிக்க தில்லைச் சிற்றம்பலத்தே
பண்ணுண்ட பாடலோடும் பரமநீ ஆடுமாறே
தேவாரத் திருப்பதிகங்களுக்கான பாராயண வலைத்தளம்:
சைவ சமயத்திற்கு அளப்பரிய தொண்டாற்றி வரும் பிரதான வலைத்தளங்களில், தேவாரம் உள்ளிட்ட பன்னிரு திருமுறைகளின் மூலம் பேணிப் பாதுகாக்கப் பெற்று வருக...
