(1)
பரவும் பரிசொன்றறியேன் நான்
பண்டே உம்மைப் பயிலாதேன்
இரவும் பகலும் நினைந்தாலும்
எய்த நினைய மாட்டேன்நான்
கரவில் அருவி கமுகுண்ணத்
தெங்கம் குலைக்கீழ்க் கருப்பாலை
அரவம் திரைக்காவிரிக் கோட்டத்து
ஐயாறுடைய அடிகேளோ
(2)
எங்கே போவேன் ஆயிடினும்
அங்கே வந்தென் மனத்தீராய்ச்
சங்கை ஒன்றும் இன்றியே
தலைநாள் கடைநாள் ஒக்கவே
கங்கை சடைமேல் கரந்தானே
கலைமான் மறியும் கனல்மழுவும்
தங்கும் திரைக்காவிரிக் கோட்டத்து
ஐயாறுடைய அடிகேளோ
(3)
மருவிப் பிரிய மாட்டேன் நான்
வழி நின்றொழிந்தேன் ஒழிகிலேன்
பருவி விச்சி மலைச்சாரல்
பட்டை கொண்டு பகடாடிக்
குருவி ஓப்பிக் கிளிகடிவார்
குழல்மேல் மாலை கொண்டோட்டம்
தரவம் திரைக் காவிரிக் கோட்டத்து
ஐயாறுடைய அடிகேளோ
(4)
பழகா நின்று பணிசெய்வார்
பெற்ற பயனொன்றறிகிலேன்
இகழாது உமக்காட் பட்டோர்க்கு
வேக படமொன்று அரைச் சாத்திக்
குழகா, வாழைக்குலை தெங்கு
கொணர்ந்து கரைமேல் எறியவே
அழகார் திரைக்காவிரிக் கோட்டத்து
ஐயாறுடைய அடிகேளோ
(5)
பிழைத்த பிழையொன்று அறியேன்நான்
பிழையைத் தீரப் பணியாயே
மழைக்கண் நல்லார் குடைந்தாட
மலையும் நிலனும் கொள்ளாமைக்
கழைக்கொள் பிரசம் கலந்தெங்கும்
கழனி மண்டிக் கையேறி
அழைக்கும் திரைக்காவிரிக் கோட்டத்து
ஐயாறுடைய அடிகேளோ
(6)
கார்க்கொள் கொன்றை சடைமேல் !ஒன்
றுடையாய், விடையாய், கையினால்
மூர்க்கர் புரமூன்றெரி செய்தாய்
முன்நீ பின்நீ முதல்வன்நீ
வார்கொள் அருவி பலவாரி
மணியும் முத்தும் பொன்னும்கொண்டு
ஆர்க்கும் திரைக்காவிரிக் கோட்டத்து
ஐயாறுடைய அடிகேளோ
(7)
மலைக்கண் மடவாள் ஒருபாலாய்ப்
பற்றி உலகம் பலிதேர்வாய்
சிலைக்கொள் கணையால் எயில்எய்த
செங்கண் விடையாய் தீர்த்தன்நீ
மலைக்கொள் அருவி பலவாரி
மணியும் முத்தும் பொன்னும் கொண்டு
அலைக்கும் திரைக்காவிரிக் கோட்டத்து
ஐயாறுடைய அடிகேளோ
(8)
போழும் மதியும் புனக்கொன்றை
புனல்சேர் சென்னிப் புண்ணியா
சூழும் அரவச் சுடர்ச்சோதீ
உன்னைத் தொழுவார் துயர்போக
வாழும் அவர்கள் அங்கங்கே
வைத்த சிந்தை உய்த்தாட்ட
ஆழும் திரைக்காவிரிக் கோட்டத்து
ஐயாறுடைய அடிகேளோ
(9)
கதிர்க்கொள் பசியே ஒத்தேநான்
கண்டேன் உம்மைக் காணாதேன்
எதிர்த்து நீந்த மாட்டேன்நான்
எம்மான் தம்மான் தம்மானே
விதிர்த்து மேகம் மழைபொழிய
வெள்ளம் பரந்து நுரைசிதறி
அதிர்க்கும் திரைக்காவிரிக் கோட்டத்து
ஐயாறுடைய அடிகேளோ
(10)
கூசி அடியார் இருந்தாலும்
குணமொன்றில்லீர் குறிப்பில்லீர்
தேச வேந்தன் திருமாலும்
மலர்மேல் அயனும் காண்கிலார்
தேசம் எங்கும் தெளிந்தாடத்
தெண்ணீர் அருவி கொணர்ந்தெங்கும்
வாசந் திரைக்காவிரிக் கோட்டத்து
ஐயாறுடைய அடிகேளோ
(11)
கூடி அடியார் இருந்தாலும்
குணமொன்றில்லீர் குறிப்பில்லீர்
ஊடி இருந்தும் உணர்கிலேன்
உம்மைத் தொண்டன் ஊரனேன்
தேடி எங்கும் காண்கிலேன்
திருவாரூரே சிந்திப்பன்
ஆடும் திரைக்காவிரிக் கோட்டத்து
ஐயாறுடைய அடிகேளோ
தேவாரத் திருப்பதிகங்களுக்கான பாராயண வலைத்தளம்:
சைவ சமயத்திற்கு அளப்பரிய தொண்டாற்றி வரும் பிரதான வலைத்தளங்களில், தேவாரம் உள்ளிட்ட பன்னிரு திருமுறைகளின் மூலம் பேணிப் பாதுகாக்கப் பெற்று வருக...
