(1)
படங்கொள் நாகம் சென்னி சேர்த்திப்
பாய்புலித்தோல் அரையில் வீக்கி
அடங்கலார் ஊர்எரியச் சீறி
அன்று மூவர்க்கருள் புரிந்தீர்
மடங்கலானைச் செற்றுகந்தீர்
மனைகள் தோறும் தலைகை ஏந்தி
விடங்கராகித் திரிவதென்னே
வேலை சூழ் வெண்காடனீரே
(2)
இழித்துகந்தீர் முன்னை வேடம்
இமையவர்க்கும் உரைகள் பேணாது
ஒழித்துகந்தீர், நீர்முன் கொண்ட
உயர் தவத்தை அமரர் வேண்ட
அழிக்க வந்த காமவேளை
அவனுடைய தாதை காண
விழித்துகந்த வெற்றி என்னே
வேலை சூழ் வெண்காடனீரே
(3)
படைகளேந்திப் பாரிடம்மும்
பாதம் போற்ற மாதும் நீரும்
உடையோர் கோவணத்த ராகி
உண்மை சொல்லீர் உம்மையன்றே
சடைகள் தாழக் கரணமிட்டுத்
தன்மை பேசி இல்பலிக்கு
விடையதேறித் திரிவதென்னே
வேலை சூழ்வெண்காடனீரே
(4)
பண்ணுளீராய்ப் பாட்டுமானீர்
பத்தர் சித்தம் பரவிக் கொண்டீர்
கண்ணுளீராய்க் கருத்தில் உம்மைக்
கருதுவார்கள் காணும் வண்ணம்
மண்ணுளீராய் மதியம் வைத்தீர்
வான நாடர் மருவி ஏத்த
விண்ணுளீராய் நிற்பதென்னே
வேலை சூழ் வெண்காடனீரே
(5)
குடமெடுத்து நீரும் பூவும்
கொண்டு தொண்டர் ஏவல் செய்ய
நடமெடுத்து ஒன்றாடிப் பாடி
நல்குவீர் நீர் புல்கும் வண்ணம்
வடமெடுத்த கொங்கை மாதோர்
பாகமாக, வார்கடல் வாய்
விடம்மிடற்றில் வைத்ததென்னே
வேலை சூழ் வெண்காடனீரே
(6)
மாறுபட்ட வனத்தகத்தின்
மருவ வந்த வன்களிற்றைப்
பீறி இட்டமாகப் போர்த்தீர்
பெய்பலிக்கென்று இல்லம் தோறும்
கூறு பட்ட கொடியும் நீரும்
குலாவி ஏற்றை அடர ஏறி
வேறுபட்டுத் திரிவதென்னே
வேலை சூழ் வெண்காடனீரே
(7)
காதலாலே கருதும் தொண்டர்
காரணத்தராகி நின்றே
பூதம் பாடப் புரிந்து நட்டம்
புவனியேத்த ஆட வல்லீர்
நீதியாக ஏழிலோசை
நித்தராகிச் சித்தர் சூழ
வேதமோதித் திரிவதென்னே
வேலை சூழ் வெண்காடனீரே
(8)
குரவு கொன்றை மதியம் மத்தம்
கொங்கை மாதர் கங்கை நாகம்
விரவுகின்ற சடையுடையீர்
விருத்தரானீர், கருத்தில் உம்மைப்
பரவும் என்மேல் பழிகள் போக்கீர்
பாகமாய மங்கை அஞ்சி
வெருவ வேழம் செற்றதென்னே
வேலை சூழ் வெண்காடனீரே
(9)
மாடம் காட்டும் கச்சியுள்ளீர்
நிச்சயத்தால் நினைப்புளார் பால்
பாடும் காட்டில் ஆடலுள்ளீர்
பரவும் வண்ணம் எங்ஙனே தான்
நாடும் காட்டில் அயனும் மாலும்
நணுகா வண்ணம் அனலுமாய
வேடம் காட்டித் திரிவதென்னே
வேலை சூழ் வெண்காடனீரே
(10)
விரித்த வேதம் ஓத வல்லார்
வேலை சூழ் வெண்காடு மேய
விருத்தனாய வேதன் தன்னை
விரிபொழில் திருநாவலூரன்
அருத்தியால் ஆரூரன் தொண்டன்
அடியன் கேட்ட மாலை பத்தும்
தெரித்த வண்ணம் மொழிய வல்லார்
செம்மையாளர் வானுளாரே
தேவாரத் திருப்பதிகங்களுக்கான பாராயண வலைத்தளம்:
சைவ சமயத்திற்கு அளப்பரிய தொண்டாற்றி வரும் பிரதான வலைத்தளங்களில், தேவாரம் உள்ளிட்ட பன்னிரு திருமுறைகளின் மூலம் பேணிப் பாதுகாக்கப் பெற்று வருக...
