(1)
இரும்பொன் மலைவில்லா, எரியம்பா நாணில்
திரிந்த புரமூன்றும் செற்றான் உறைகோயில்
தெரிந்த அடியார்கள் சென்ற திசைதோறும்
விரும்பி எதிர்கொள்வார் வீழிமிழலையே
(2)
வாதைப் படுகின்ற வானோர் துயர்தீர
ஓதக் கடல்நஞ்சை உண்டான் உறைகோயில்
கீதத்திசையோடும் கேள்விக்கிடையோடும்
வேதத்தொலி ஓவா வீழிமிழலையே
(3)
பயிலும் மறையாளன் தலையில் பலிகொண்டு
துயிலும் பொழுதாடும் சோதி உறைகோயில்
மயிலும் மடமானும் மதியும் இளவேயும்
வெயிலும் பொலிமாதர் வீழிமிழலையே
(4)
இரவன் பகலோனும் எச்சத்திமையோரை
நிரவிட்டருள் செய்த நிமலன் உறைகோயில்
குரவம் சுரபுன்னை குளிர்கோங்கிள வேங்கை
விரவும் பொழில் அந்தண் வீழிமிழலையே
(5)
கண்ணில் கனலாலே காமன் பொடியாகப்
பெண்ணுக்கருள்செய்த பெருமான் உறைகோயில்
மண்ணில் பெருவேள்வி வளர்தீப் புகைநாளும்
விண்ணில் புயல்காட்டும் வீழிமிழலையே
(6)
மால் ஆயிரம்கொண்டு மலர்க்கண்ணிட ஆழி
ஏலாவலயத்தோடு ஈந்தான்உறை கோயில்
சேலாகிய பொய்கைச் செழுநீர்க் கமலங்கள்
மேலால் எரிகாட்டும் வீழிமிழலையே
(7)
மதியால் வழிபட்டான் வாணாள் கொடுபோவான்
கொதியா வருகூற்றைக் குமைத்தான் உறைகோயில்
நெதியான் மிகுசெல்வர் நித்த நியமங்கள்
விதியால் நிற்கின்றார் வீழிமிழலையே
(8)
எடுத்தான் தருக்கினை இழித்தான் விரலூன்றிக்
கொடுத்தான் வாள் ஆளாக்கொண்டான் உறைகோயில்
படித்தார், மறைவேள்வி பயின்றார், பாவத்தை
விடுத்தார் மிகவாழும் வீழிமிழலையே
(9)
கிடந்தான் இருந்தானும் கீழ்மேல் காணாது
தொடர்ந்தாங்கவரேத்தச் சுடராயவன் கோயில்
படந்தாங்கரவல்குல் பவளத் துவர்வாய் மேல்
விடம்தாங்கிய கண்ணார் வீழிமிழலையே
(10)
சிக்கார் துவராடைச் சிறுதட்டுடையாரும்
நக்காங்கலர் தூற்றும் நம்பான் உறைகோயில்
தக்கார் மறைவேள்வித் தலையாய் உலகுக்கு
மிக்கார் அவர்வாழும் வீழிமிழலையே
(11)
மேல் நின்றிழி கோயில் வீழிமிழலையுள்
ஏனத்தெயிற்றானை எழிலார் பொழிற்காழி
ஞானத்துயர்கின்ற நலங்கொள் சம்பந்தன்
வாய்மைத்திவை சொல்ல வல்லோர் நல்லோரே
தேவாரத் திருப்பதிகங்களுக்கான பாராயண வலைத்தளம்:
சைவ சமயத்திற்கு அளப்பரிய தொண்டாற்றி வரும் பிரதான வலைத்தளங்களில், தேவாரம் உள்ளிட்ட பன்னிரு திருமுறைகளின் மூலம் பேணிப் பாதுகாக்கப் பெற்று வருக...
