(1)
பவனமாய்ச் சோடையாய் நாஎழாப் பஞ்சுதோய்ச் சட்ட உண்டு
சிவனதாள் சிந்தியாப் பேதைமார் போலநீ வெள்கினாயே
கவனமாய்ப் பாய்வதோர் ஏறுகந்தேறிய காளகண்டன்
அவனது ஆரூர் தொழுதுய்யலாம், மையல் கொண்டு அஞ்சல் நெஞ்சே
(2)
தந்தையார் போயினார், தாயரும் போயினார், தாமும் போவார்
கொந்தவேல் கொண்டொரு கூற்றத்தார் பார்க்கின்றார் கொண்டுபோவார்
எந்தநாள் வாழ்வதற்கே மனம் வைத்தியால் ஏழை நெஞ்சே
அந்தண் ஆரூர் தொழுதுய்யலாம், மையல்கொண்டு அஞ்சல் நெஞ்சே
(3)
நிணங்குடர் தோள்நரம்பு என்புசேர் ஆக்கைதான் நிலாயதன்றால்
குணங்களார்க்கல்லது குற்ற நீங்காதெனக் குலுங்கினாயே
வணங்குவார் வானவர் தானவர் வைகலும் மனங்கொடேத்தும்
அணங்கன் ஆரூர் தொழுதுய்யலாம், மையல்கொண்டு அஞ்சல் நெஞ்சே
(4)
நீதியால் வாழ்கிலை, நாள்செலா நின்றன, நித்த நோய்கள்
வாதியா, ஆதலால் நாளுநாள் இன்பமே மருவினாயே
சாதியார் கின்னரர் தருமனும் வருணர்கள் ஏத்து முக்கண்
ஆதிஆரூர் தொழுய்யலாம், மையல்கொண்டு அஞ்சல் நெஞ்சே
(5)
பிறவியால் வருவன கேடுள, ஆதலால் பெரிய இன்பத்
துறவியார்க்கல்லது துன்ப நீங்காதெனத் தூங்கினாயே
மறவல்நீ, மார்க்கமே நண்ணினாய், தீர்த்தநீர் மல்கு சென்னி
அறவன்ஆரூர் தொழுதுய்யலாம், மையல்கொண்டு அஞ்சல் நெஞ்சே
(6)
செடிகொள் நோய்ஆக்கை ஐம்பாம்பின் வாய்த் தேரைவாய்ச் சிறுபறவை
கடிகொள் பூந்தேன் சுவைத்து இன்புறலாமென்று கருதினாயே
முடிகளால் வானவர் முன்பணிந்தன்பராய் ஏத்து முக்கண்
அடிகள்ஆரூர் தொழுதுய்யலாம், மையல்கொண்டு அஞ்சல் நெஞ்சே
(7)
ஏறுமால் யானையே சிவிகை அந்தளகம் ஈச்சோப்பி வட்டின்
மாறி வாழ் உடம்பினார் படுவதோர் நடலைக்கு மயங்கினாயே
மாறிலா வனமுலை மங்கையோர் பங்கினர், மதியம் வைத்த
ஆறன்ஆரூர் தொழுதுய்யலாம், மையல்கொண்டு அஞ்சல் நெஞ்சே
(8)
என்பினால் கழிநிரைத்து, இறைச்சிமண் சுவரெறிந்து, இதுநம் இல்லம்
புன்புலால் நாறுதோல் போர்த்துப் பொல்லாமையால் முகடு கொண்டு
முன்பெலாம் ஒன்பது வாய்தலார் குரம்பையில் மூழ்கிடாதே
அன்பன்ஆரூர் தொழுதுய்யலாம், மையல்கொண்டு அஞ்சல் நெஞ்சே
(9)
தந்தை தாய் தன்னுடன் தோன்றினார், புத்திரர் தாரமென்னும்
பந்த நீங்காதவர்க்குய்ந்து போக்கில்எனப் பற்றினாயே
வெந்த நீறாடியார் ஆதியார் சோதியார் வேதகீதர்
எந்தைஆரூர் தொழுதுய்யலாம், மையல்கொண்டு அஞ்சல் நெஞ்சே
(10)
நெடியமால் பிரமனும் நீண்டுமண் இடந்தின்ன நேடிக் காணாப்
படியனார், பவளம்போல் உருவனார், பனிவளர் மலையாள் பாக
வடிவனார், மதிபொதி சடையனார், மணியணி கண்டத்தெண்தோள்
அடிகள் ஆரூர் தொழுதுய்யலாம், மையல்கொண்டு அஞ்சல் நெஞ்சே
(11)
பல்லிதழ் மாதவி அல்லி வண்டு யாழ்செயும் காழியூரன்
நல்லவே நல்லவே சொல்லிய ஞானசம்பந்தன் ஆரூர்
எல்லியம் போது எரியாடும் எம்ஈசனை ஏத்து பாடல்
சொல்லவே வல்லவர் தீதிலார் ஒதநீர் வையகத்தே
தேவாரத் திருப்பதிகங்களுக்கான பாராயண வலைத்தளம்:
சைவ சமயத்திற்கு அளப்பரிய தொண்டாற்றி வரும் பிரதான வலைத்தளங்களில், தேவாரம் உள்ளிட்ட பன்னிரு திருமுறைகளின் மூலம் பேணிப் பாதுகாக்கப் பெற்று வருக...
