(1)
மையாடிய கண்டன், மலைமகள் பாகமதுடையான்
கையாடிய கேடில் கரியுரி மூடிய ஒருவன்
செய்யாடிய குவளைம் மலர் நயனத்தவளோடும்
நெய்யாடிய பெருமான் இடம் நெய்த்தானம் எனீரே
(2)
பறையும் பழிபாவம், படு துயரம் பலதீரும்
பிறையும் புனலரவும் படுசடை எம்பெருமான் ஊர்
அறையும்புனல் வருகாவிரி அலைசேர் வடகரை மேல்
நிறையும்புனை மடவார்பயில் நெய்த்தானம் எனீரே
(3)
பேயாயின பாடப்பெரு நடமாடிய பெருமான்
வேயாயின தோளிக்கொரு பாகம்மிக உடையான்
தாயாகிய உலகங்களை நிலைபேறுசெய் தலைவன்
நேயாடிய பெருமான்இடம் நெய்த்தானம் எனீரே
(4)
சுடுநீறணி அண்ணல்சுடர் சூலம் அனலேந்தி
நடுநள்ளிருள் நடமாடிய நம்பனுறை இடமாம்
கடுவாளிள அரவாடுமிழ் கடல் நஞ்சமதுஉண்டான்
நெடுவாளைகள் குதிகொள்உயர் நெய்த்தானம் எனீரே
(5)
நுகர் ஆரமொடேலம் மணி செம்பொன் உரைஉந்திப்
பகராவரு புனல்காவிரி பரவிப் பணிந்தேத்தும்
நிகரான்மணலிடு தண்கரை நிகழ்வாய நெய்த்தான
நகரான் அடியேத்த நமைநடலை அடையாவே
(6)
விடையார் கொடியுடைய அணல், வீந்தார் வெளை எலும்பும்
உடையார், நறுமாலை சடையுடையார், அவர் மேய
புடையேபுனல் பாயும்வயல் பொழில்சூழ்ந்த நெய்த்தானம்
அடையாதவர் என்றும் அமருலகம் அடையாரே
(7)
நிழலார்வயல் கமழ்சோலைகள் நிறைகின்ற நெய்த்தானத்து
அழலானவன் அனல்அங்கையில் ஏந்திஅழகாய
கழலான் அடி நாளும் கழலாதே விடலின்றித்
தொழலாரவர் நாளும் துயரின்றித் தொழுவாரே
(8)
அறையார்கடல் இலங்கைக்கிறை அணிசேர் கயிலாயம்
இறையாரமுன் எடுத்தான்இருபது தோளிற ஊன்றி
நிறையார்புனல் நெய்த்தானன்நல் நிகழ்சேவடி பரவக்
கறையார்கதிர் வாள்ஈந்தவர் கழல்ஏத்துதல் கதியே
(9)
கோலம்முடி நெடுமாலொடு, கொய் தாமரையானும்
சீலம் அறிவரிதாய் ஒளி திகழ்வாய நெய்த்தானம்
காலம்பெற மலர்நீரவை தூவித் தொழுதேத்தும்
ஞாலம்புகழ் அடியாருடல் உறுநோய் நலியாவே
(10)
மத்தம்மலி சித்தத்திறை மதியில்அவர் சமணர்
புத்தர்அவர் சொன்னம்மொழி பொருளா நினையேன்மின்
நித்தம்பயில் நிமலன்உறை நெய்த்தானமதேத்தும்
சித்தம்உடை அடியார்உடல் செறுநோய் அடையாவே
(11)
தலமல்கிய புனற்காழியுள் தமிழ்ஞான சம்பந்தன்
நிலமல்கிய புகழான்மிகு நெய்த்தானனை நிகரில்
பலமல்கிய பாடல்இவை பத்தும் மிக வல்லார்
சிலமல்கிய செல்வன்அடி சேர்வர் சிவகதியே
தேவாரத் திருப்பதிகங்களுக்கான பாராயண வலைத்தளம்:
சைவ சமயத்திற்கு அளப்பரிய தொண்டாற்றி வரும் பிரதான வலைத்தளங்களில், தேவாரம் உள்ளிட்ட பன்னிரு திருமுறைகளின் மூலம் பேணிப் பாதுகாக்கப் பெற்று வருக...
