(1)
கொல்லியான்; குளிர் தூங்கு குற்றாலத்தான்
புல்லியார் புரம் மூன்றெரி செய்தவன்
நெல்லியான்; நிலையான நெய்த்தானனைச்
சொல்லி மெய்தொழுவார் சுடர் வாணரே
(2)
இரவனை, இடு வெண்தலை ஏந்தியைப்
பரவனைப், படையார் மதில் மூன்றையும்
நிரவனை, நிலையான நெய்த்தானனைக்
குரவனைத் தொழுவார் கொடிவாணரே
(3)
ஆனிடை ஐந்தும் ஆடுவர், ஆரிருள்
கானிடை நடம் ஆடுவர் காண்மினோ
தேனிடை மலர் பாயும் நெய்த்தானனை
வானிடைத் தொழுவார் வலி வாணரே
(4)
விண்டவர் புரமூன்றும் வெண்ணீறெழக்
கண்டவன், கடிதாகிய நஞ்சினை
உண்டவன், ஒளியான நெய்த்தானனைத்
தொண்டராய்த் தொழுவார் சுடர்வாணரே
(5)
முன்கை நோவக் கடைந்தவர் நிற்கவே
சங்கியாது சமுத்திர நஞ்சுண்டான்
நங்கையோடு நவின்ற நெய்த்தானனைத்
தங்கையால் தொழுவார் தலைவாணரே
(6)
சுட்ட நீறு மெய்பூசிச் சுடலையுள்
நட்டமாடுவர் நள்ளிருள் பேயொடே
சிட்டர் வானவர் தேரு நெய்த்தானனை
இட்டமாய்த் தொழுவார் இன்பவாணரே
(7)
கொள்ளித் தீயெரி வீசிக் கொடியதோர்
கள்ளிக் காட்டிடை ஆடுவர் காண்மினோ
தெள்ளித் தேறித் தெளிந்து நெய்த்தானனை
உள்ளத்தால் தொழுவார் உம்பர் வாணரே
(8)
உச்சி மேல் விளங்கும் இள வெண்பிறை
பற்றி ஆடரவோடும் சடைப் பெய்தான்
நெற்றி ஆரழல் கண்ட நெய்த்தானனைச்
சுற்றி மெய்தொழுவார் சுடர் வாணரே
(9)
மாலொடும் மறையோதிய நான்முகன்
காலொடும் முடி காண்பரிதாயினான்
சேலொடும் செருச் செய்யும் நெய்த்தானனை
மாலொடும் தொழுவார் வினை வாடுமே
(10)
வலிந்த தோள்வலி வாளரக்கன் தனை
நெருங்க நீள்வரை ஊன்று நெய்த்தானனார்
புரிந்து கைந்நரம்போடு இசை பாடலும்
பரிந்தனைப் பணிவார் வினை பாறுமே
தேவாரத் திருப்பதிகங்களுக்கான பாராயண வலைத்தளம்:
சைவ சமயத்திற்கு அளப்பரிய தொண்டாற்றி வரும் பிரதான வலைத்தளங்களில், தேவாரம் உள்ளிட்ட பன்னிரு திருமுறைகளின் மூலம் பேணிப் பாதுகாக்கப் பெற்று வருக...
