(1)
வானத்திளமதியும் பாம்பும் தம்மில்
வளர்சடைமேல் ஆதரிப்ப வைத்தார் போலும்
தேனைத் திளைத்துண்டு வண்டு பாடும்
தில்லை நடமாடும் தேவர் போலும்
ஞானத்தின் ஒண்சுடராய் நின்றார் போலும்
நன்மையும் தீமையுமானார் போலும்
தேனொத்த அடியார்க்கினியார் போலும்
திருச்சாய்க்காட்டு இனிதுறையும் செல்வர் தாமே
(2)
விண்ணோர் பரவ நஞ்சுண்டார் போலும்
வியன் துருத்தி வேள்விக்குடியார் போலும்
அண்ணாமலை உறையும் அண்ணல் போலும்
அதியரைய மங்கை அமர்ந்தார் போலும்
பண்ணார் களிவண்டு பாடியாடும்
பராய்த்துறையுள் மேய பரமர் போலும்
திண்ணார் புகார் முத்தலைக்கும் தெண்ணீர்த்
திருச்சாய்க்காட்ல் இனிதுறையும் செல்வர் தாமே
(3)
கானிரிய வேழம் உரித்தார் போலும்
காவிரிப் பூம்பட்டினத்துள்ளார் போலும்
வானிரிய வருபுரம் மூன்றெரித்தார் போலும்
வடகயிலை மலையதுதம் இருக்கை போலும்
ஊனிரியத் தலைகலனா உடையார் போலும்
உயர்தோணி புரத்துறையும் ஒருவர் போலும்
தேனிரிய மீன்பாயும் தெண்ணீர்ப் பொய்கைத்
திருச்சாய்க்காட்டில் இனிதுறையும் செல்வர் தாமே
(4)
ஊனுற்ற வெண்தலைசேர் கையர் போலும்
ஊழி பல கண்டிருந்தார் போலும்
மானுற்ற கரதலம் ஒன்றுடையார் போலும்
மறைக்காட்டுக் கோடி மகிழ்ந்தார் போலும்
கானுற்ற ஆடல் அமர்ந்தார் போலும்
காமனையும் கண்ணழலால் காய்ந்தார் போலும்
தேனுற்ற சோலை திகழ்ந்து தோன்றும்
திருச்சாய்க்காட்டில் இனிதுறையும் செல்வர் தாமே
(5)
கார்மல்கு கொன்றையந்தாரார் போலும்
காலனையும் ஓருதையால் கண்டார் போலும்
பார்மல்கி ஏத்தப் படுவார் போலும்
பருப்பதத்தே பல்லூழி நின்றார் போலும்
ஊர்மல்கு பிச்சைக்குழன்றார் போலும்
ஓத்தூர் ஒருநாளும் நீங்கார் போலும்
சீர்மல்கு பாடல் உகந்தார் போலும்
திருச்சாய்க்காட்டில் இனிதுறையும் செல்வர் தாமே
(6)
மாவாய் பிளந்துகந்த மாலும், செய்ய
மலரவனும் தாமேயாய் நின்றார் போலும்
மூவாத மேனி முதல்வர் போலும்
முதுகுன்ற மூதூர் உடையார் போலும்
கோவாய முனி தன்மேல் வந்த கூற்றைக்
குரைகழலால் அன்று குமைத்தார் போலும்
தேவாதி தேவர்க்கரியார் போலும்
திருச்சாய்க்காட்டில் இனிதுறையும் செல்வர் தாமே
(7)
கடுவெளியோடு ஒரைந்தும் ஆனார் போலும்
காரோணத்தென்றும் இருப்பார் போலும்
இடிகுரல்வாய்ப் பூதப் படையார் போலும்
ஏகம்பம் மேவி இருந்தார் போலும்
படியொருவர் இல்லாப் படியார் போலும்
பாண்டிக்கொடுமுடியும் தம்மூர் போலும்
செடிபடு நோய் அடியாரைத் தீர்ப்பார் போலும்
திருச்சாய்க்காட்டில் இனிதுறையும் செல்வர் தாமே
(8)
விலையிலா ஆரம்சேர் மார்பர் போலும்
வெண்ணீறு மெய்க்கணிந்த விகிர்தர் போலும்
மலையினார் மங்கை மணாளர் போலும்
மாற்பேறு காப்பாய் மகிழ்ந்தார் போலும்
தொலைவிலார் புரமூன்றும் தொலைத்தார் போலும்
சோற்றுத்துறை துருத்தி உள்ளார் போலும்
சிலையினார் செங்கண் அரவர் போலும்
திருச்சாய்க்காட்டில் இனிதுறையும் செல்வர் தாமே
(9)
அல்லல் அடியார்க்கறுப்பார் போலும்
அமருலகம் தம்அடைந்தார்க்கு காட்சி போலும்
நல்லமும் நல்லூரும் மேயார் போலும்
நள்ளாறு நாளும் பிரியார் போலும்
முல்லை முகை நகையாள் பாகர் போலும்
முன்னமே தோன்றி முளைத்தார் போலும்
தில்லை நடமாடும் தேவர் போலும்
திருச்சாய்க்காட்டில் இனிதுறையும் செல்வர் தாமே
(10)
உறைப்புடைய இராவணன் பொன்மலையைக் கையால்
ஊக்கம் செய்தெடுத்தலுமே உமையாள் அஞ்ச
நிறைப்பெருந்தோள் இருபதும் பொன்முடிகள் பத்தும்
நிலஞ்சேர விரல் வைத்த நிமலர் போலும்
பிறைப்பிளவு சடைக்கணிந்த பெம்மான் போலும்
பெண்ஆண் உருவாகி நின்றார் போலும்
சிறப்புடைய அடியார்கட்கினியார் போலும்
திருச்சாய்க்காட்டில் இனிதுறையும் செல்வர் தாமே
தேவாரத் திருப்பதிகங்களுக்கான பாராயண வலைத்தளம்:
சைவ சமயத்திற்கு அளப்பரிய தொண்டாற்றி வரும் பிரதான வலைத்தளங்களில், தேவாரம் உள்ளிட்ட பன்னிரு திருமுறைகளின் மூலம் பேணிப் பாதுகாக்கப் பெற்று வருக...
