(1)
வானார்சோதி மன்னுசென்னி வன்னி புனம் கொன்றைத்
தேனார்போது தானார்கங்கை திங்களொடுசூடி
மானேர்நோக்கி கண்டங்கு உவப்ப மாலையாடுவார்
கானூர்மேய கண்ணார் நெற்றியான் ஊர் செல்வரே
(2)
நீந்தலாகா வெள்ளமூழ்கு நீள்சடை தன்மேலோர்
ஏய்ந்தகோணல் பிறையோடரவு கொன்றை எழிலாரப்
போந்த மென்சொல் இன்பம் பயந்த மைந்தர்அவர் போலாம்
காந்தள்விம்மு கானூர்மேய சாந்த நீற்றாரே
(3)
சிறையார்வண்டும் தேனும்விம்மு செய்ய மலர்க்கொன்றை
மறையார்பாடல் ஆடலோடு மால்விடை மேல்வருவார்
இறையார்வந்தென் இல்புகுந்தென் எழில்நலமும் கொண்டார்
கறையார்சோலைக் கானூர்மேய பிறையார் சடையாரே
(4)
விண்ணார் திங்கள் கண்ணிவெள்ளை மாலை அதுசூடித்
தண்ணார்அக்கோடு ஆமைபூண்டு தழைபுன் சடைதாழ
எண்ணா வந்தென் இல்புகுந்தங்கு எவ்வ நோய்செய்தான்
கண்ணார் சோலைக் கானூர்மேய விண்ணோர் பெருமானே
(5)
தார்கொள் கொன்றைக் கண்ணியோடும் தண் மதியஞ்சூடி
சீர்கொள்பாடல் ஆடலோடு சேடராய் வந்து
ஊர்கள் தோறும் ஐயமேற்று என்னுள் வெந்நோய் செய்தார்
கார்கொள் சோலைக் கானூர்மேய கறைக் கண்டத்தாரே
(6)
முளிவெள் எலும்பு நீறுநூலு மூழ்கு மார்பராய்
எளிவந்தார் போல் ஐயம்என்றென் இல்லே புகுந்து உள்ளத்
தெளிவுநாணும் கொண்ட கள்வர் தேறலார் பூவில்
களிவண்டு யாழ்செய் கானூர்மேய ஒளிவெண் பிறையாரே
(7)
மூவா வண்ணர்; முளைவெண் பிறையர்; முறுவல் செய்திங்கே
பூவார்கொன்றை புனைந்து வந்தார்; பொக்கம் பலபேசிப்
போவார் போல மால் செய்துள்ளம் புக்க புரிநூலர்
தேவார்சோலைக் கானூர்மேய தேவ தேவரே
(8)
தமிழின் நீர்மை பேசித்தாளம் வீணை பண்ணிநல்ல
முழவமொந்தை மல்குபாடல் செய்கை இடமோவார்
குமிழின்மேனி தந்துகோல நீர்மை அதுகொண்டார்
கமழும் சோலைக் கானூர்மேய பவள வண்ணரே
(9)
அந்தம்ஆதி அயனுமாலும் ஆர்க்கும் அறிவரியான்
சிந்தையுள்ளு நாவின்மேலும் சென்னியும் மன்னினான்
வந்தென் உள்ளம் புகுந்துமாலை காலை ஆடுவான்
கந்தமல்கு கானூர்மேய எந்தை பெம்மானே
(10)
ஆமை அரவோடு ஏன வெண்கொம்பு அக்கு மாலைபூண்டு
ஆமோர் கள்வர் வெள்ளர்போல உள் வெந்நோய் செய்தார்
ஓமவேத நான்முகனும் கோண் நாகணையானும்
சேமமாய செல்வர் கானூர் மேய சேடரே
(11)
கழுது துஞ்சும் கங்குலாடும் கானூர் மேயானைப்
பழுதின்ஞான சம்பந்தன்சொல் பத்தும் பாடியே
தொழுதுபொழுது தோத்திரங்கள் சொல்லித் துதித்துநின்று
அழுதுநக்கும் அன்புசெய்வார் அல்லல் அறுப்பாரே
தேவாரத் திருப்பதிகங்களுக்கான பாராயண வலைத்தளம்:
சைவ சமயத்திற்கு அளப்பரிய தொண்டாற்றி வரும் பிரதான வலைத்தளங்களில், தேவாரம் உள்ளிட்ட பன்னிரு திருமுறைகளின் மூலம் பேணிப் பாதுகாக்கப் பெற்று வருக...
