(1)
வனபவள வாய்திறந்து வானவர்க்கும் தானவனே என்கின்றாளால்
சினபவளத் திண்தோள் மேல் சேர்ந்திலங்கு வெண்ணீற்றன் என்கின்றாளால்
அனபவள மேகலையொடு அப்பாலைக்கப்பாலான் என்கின்றாளால்
கனபவளம் சிந்தும் கழிப்பாலைச் சேர்வானைக் கண்டாள் கொல்லோ
(2)
வண்டுலவு கொன்றை வளர்புன் சடையானே என்கின்றாளால்
விண்டலர்ந்து நாறுவதொர் வெள்ளெருக்க நாண்மலருண்டு என்கின்றாளால்
உண்டயலே தோன்றுவதொர் உத்தரியப் பட்டுடையன் என்கின்றாளால்
கண்டயலே தோன்றும் கழிப்பாலைச் சேர்வானைக் கண்டாள் கொல்லோ
(3)
பிறந்திளைய திங்களெம் பெம்மான் முடிமேலது என்கின்றாளால்
நிறங்கிளரும் குங்குமத்தின் மேனி அவன்நிறமே என்கின்றாளால்
மறங்கிளர் வேல் கண்ணாள் மணிசேர் மிடற்றவனே என்கின்றாளால்
கறங்கோத மல்கும் கழிப்பாலைச் சேர்வானைக் கண்டாள் கொல்லோ
(4)
இரும்பார்ந்த சூலத்தன் ஏந்தியொர் வெண்மழுவன் என்கின்றாளால்
சுரும்பார் மலர்க்கொன்றைச் சுண்ண வெண்ணீற்றவனே என்கின்றாளால்
பெரும்பாலனாகி ஒர் பிஞ்ஞக வேடத்தன் என்கின்றாளால்
கரும்பானல் பூக்கும் கழிப்பாலைச் சேர்வானைக் கண்டாள் கொல்லோ
(5)
பழியிலான் புகழுடையன் பால்நீற்றன் ஆனேற்றன் என்கின்றாளால்
விழியுலாம் பெருந்தடங்கண் இரண்டல்ல மூன்றுளவே என்கின்றாளால்
சுழியுலாம் வருகங்கை தோய்ந்த சடையவனே என்கின்றாளால்
கழியுலாம் சூழ்ந்த கழிப்பாலைச் சேர்வானைக் கண்டாள் கொல்லோ
(6)
பண்ணார்ந்த வீணை பயின்ற விரலவனே என்கின்றாளால்
எண்ணார் புரமெரித்த எந்தை பெருமானே என்கின்றாளால்
பண்ணார் முழவதிரப் பாடலொடு ஆடலனே என்கின்றாளால்
கண்ணார் பூஞ்சோலைக் கழிப்பாலைச் சேர்வானைக் கண்டாள் கொல்லோ
(7)
முதிரும் சடைமுடிமேல் மூழ்கும் இளநாகம் என்கின்றாளால்
அதுகண்டு அதனருகே தோன்றும் இளமதியம் என்கின்றாளால்
சதுர்வெண் பளிக்குக் குழைகாதில் மின்னிடுமே என்கின்றாளால்
கதிர்முத்தம் சிந்தும் கழிப்பாலைச் சேர்வானைக் கண்டாள் கொல்லோ
(8)
ஓரோதம் ஓதி உலகம் பலிதிரிவான் என்கின்றாளால்
நீரோதம் ஏற நிமிர்புன் சடையானே என்கின்றாளால்
பாரோத மேனிப் பவளம் அவன்நிறமே என்கின்றாளால்
காரோத மல்கும் கழிப்பாலைச் சேர்வானைக் கண்டாள் கொல்லோ
(9)
வானுலாம் திங்கள் வளர்புன் சடையானே என்கின்றாளால்
ஊனுலாம் வெண்தலை கொண்டூரூர் பலிதிரிவான் என்கின்றாளால்
தேனுலாம் கொன்றை திளைக்கும் திருமார்பன் என்கின்றாளால்
கானுலாம் சூழ்ந்த கழிப்பாலைச் சேர்வானைக் கண்டாள் கொல்லோ
(10)
அடர்ப்பரிய இராவணனை அருவரைக்கீழ் அடர்த்தவனே என்கின்றாளால்
சுடர்ப்பெரிய திருமேனிச் சுண்ண வெண்ணீற்றவனே என்கின்றாளால்
மடற்பெரிய ஆலின்கீழ் அறம் நால்வர்க்கன்றுரைத்தான் என்கின்றாளால்
கடற்கருவி சூழ்ந்த கழிப்பாலைச் சேர்வானைக் கண்டாள் கொல்லோ
தேவாரத் திருப்பதிகங்களுக்கான பாராயண வலைத்தளம்:
சைவ சமயத்திற்கு அளப்பரிய தொண்டாற்றி வரும் பிரதான வலைத்தளங்களில், தேவாரம் உள்ளிட்ட பன்னிரு திருமுறைகளின் மூலம் பேணிப் பாதுகாக்கப் பெற்று வருக...
