(1)
கோனைக் காவிக் குளிர்ந்த மனத்தராய்த்
தேனைக் காவி உண்ணார் சில தெண்ணர்கள்
ஆனைக்காவில் எம்மானை அணைகிலார்
ஊனைக் காவி உழிதர்வர் ஊமரே
(2)
திருகு சிந்தையைத் தீர்த்துச் செம்மை செய்து
பருகி ஊறலைப் பற்றிப் பதமறிந்து
உருகி நைபவர்க்கு ஊனம் ஒன்றின்றியே
அருகு நின்றிடும் ஆனைக்கா அண்ணலே
(3)
துன்பமின்றித் துயரின்றி என்றும்நீர்
இன்பம் வேண்டில் இராப்பகல் ஏத்துமின்
என்பொன் ஈசன் இறைவன் என்றுள்குவார்க்கு
அன்பனாயிடும் ஆனைக்கா அண்ணலே
(4)
நாவால் நன்று நறுமலர்ச் சேவடி
ஓவாதேத்தி உளத்தடைத்தார் வினை
காவாய் என்றுதம் கை தொழுவார்க்கெலாம்
ஆவா என்றிடும் ஆனைக்கா அண்ணலே
(5)
வஞ்சமின்றி வணங்குமின் வைகலும்
வெஞ்சொல் இன்றி விலகுமின் வீடுற
நைஞ்சு நைஞ்சு நின்று உள் குளிர்வார்க்கெலாம்
அஞ்சல் என்றிடும் ஆனைக்கா அண்ணலே
(6)
நடையை மெய்யென்று நாத்திகம் பேசாதே
படைகள் போல்வரும் பஞ்சமா பூதங்கள்
தடையொன்றின்றியே தன் அடைந்தார்க்கெலாம்
அடைய நின்றிடும் ஆனைக்கா அண்ணலே
(7)
ஒழுகு மாடத்துள் ஒன்பது வாய்தலும்
கழுகரிப்பதன் முன்னம் கழலடி
தொழுது கைகளால் தூமலர் தூவிநின்று
அழுமவர்க்கன்பன் ஆனைக்கா அண்ணலே
(8)
உருளும் போதறிவொண்ணா உலகத்தீர்
தெருளும் சிக்கெனத் தீவினை சேராதே
இருளறுத்து நின்று ஈசன் என்பார்க்கெலாம்
அருள் கொடுத்திடும் ஆனைக்கா அண்ணலே
(9)
நேசமாகி நினை மடநெஞ்சமே
நாசமாய குலநலம் சுற்றங்கள்
பாசமற்றுப் பராபர ஆனந்த
ஆசையுற்றிடும் ஆனைக்கா அண்ணலே
(10)
ஓதமாகடல் சூழ்இலங்கைக்கிறை
கீதம் கின்னரம் பாடக் கெழுவினான்
பாதம் வாங்கிப் பரிந்தருள் செய்தங்கோர்
ஆதியாயிடும் ஆனைக்கா அண்ணலே
தேவாரத் திருப்பதிகங்களுக்கான பாராயண வலைத்தளம்:
சைவ சமயத்திற்கு அளப்பரிய தொண்டாற்றி வரும் பிரதான வலைத்தளங்களில், தேவாரம் உள்ளிட்ட பன்னிரு திருமுறைகளின் மூலம் பேணிப் பாதுகாக்கப் பெற்று வருக...
