(1)
முன்னானைத், தோல்போர்த்த மூர்த்தி தன்னை
மூவாத சிந்தையே மனமே வாக்கே
தன்ஆனையாப் பண்ணி ஏறினானைச்
சார்தற்கரியானை, தாதை தன்னை
என்ஆனைக் கன்றினை, என் ஈசன் தன்னை
எறிநீர்த் திரையுகளும் காவிரிசூழ்
தென்னானைக், காவானைத், தேனைப் பாலைச்
செழுநீர்த் திரளைச் சென்றாடினேனே
(2)
மருந்தானை, மந்திரிப்பார் மனத்துளானை
வளர்மதியம் சடையானை, மகிழ்ந்தென் உள்ளத்து
இருந்தானை, இறப்பிலியைப் பிறப்பிலானை
இமையவர்தம் பெருமானை, உமையாள் அஞ்சக்
கருந்தான மதகளிற்றின் உரி போர்த்தானைக்
கனமழுவாள் படையானைப், பலிகொண்டு ஊரூர்
திரிந்தானைத், திருவானைக்கா உளானைச்
செழுநீர்த் திரளைச் சென்றாடினேனே
(3)
முற்றாத வெண்திங்கள் கண்ணியானை
முந்நீர் நஞ்சுண்டு இமையோர்க்கமுதம் நல்கும்
உற்றானைப், பல்லுயிர்க்கும் துணையானானை
ஓங்காரத்துட்பொருளை, உலகமெல்லாம்
பெற்றானைப், பின்னிறக்கம் செய்வான் தன்னைப்
பிரானென்று போற்றாதார் புரங்கள் மூன்றும்
செற்றானைத், திருவானைக்கா உளானைச்
செழுநீர்த் திரளைச் சென்றாடினேனே
(4)
காராரும் கறைமிடற்றெம் பெருமான் தன்னைக்
காதில்வெண் குழையானைக், கமழ் பூங்கொன்றைத்
தாரானைப், புலியதளின் ஆடையானைத்
தானன்றி வேறொன்றுமில்லா ஞானப்
பேரானை, மணியார மார்பினானைப்
பிஞ்ஞகனைத், தெய்வ நான்மறைகள் பூண்ட
தேரானைத், திருவானைக்கா உளானைச்
செழுநீர்த் திரளைச் சென்றாடினேனே
(5)
பொய்யேதும் இல்லாத மெய்யன் தன்னைப்
புண்ணியனை, நண்ணாதார் புரம்நீறாக
எய்தானைச், செய்தவத்தின் மிக்கான் தன்னை
ஏறமரும் பெருமானை, இடமான் ஏந்தும்
கையானைக், கங்காள வேடத்தானைக்
கட்டங்கக் கொடியானைக், கனல்போல் மேனிச்
செய்யானைத், திருவானைக்கா உளானைச்
செழுநீர்த் திரளைச் சென்றாடினேனே
(6)
கலையானைப், பரசுதர பாணியானைக்
கனவயிரத் திரளானை, மணி மாணிக்க
மலையானை, என்தலையின் உச்சியானை
வார்தரு புன்சடையானை, மயானம் மன்னும்
நிலையானை, வரியரவு நாணாக் கோத்து
நினையாதார் புரமெரிய வளைத்த மேருச்
சிலையானைத், திருவானைக்கா உளானைச்
செழுநீர்த் திரளைச் சென்றாடினேனே
(7)
ஆதியனை, எறிமணியின் ஓசையானை
அண்டத்தார்க்கறிவொண்ணாது அப்பால் மிக்க
சோதியனைத், தூமறையின் பொருளான் தன்னைச்
சுரும்பமரும் மலர்க்கொன்றை தொன்னூல் பூண்ட
வேதியனை, அறமுரைத்த பட்டன் தன்னை
விளங்குமலர் அயன் சிரங்கள் ஐந்தில் ஒன்றைச்
சேதியனைத், திருவானைக்கா உளானைச்
செழுநீர்த் திரளைச் சென்றாடினேனே
(8)
மகிழ்ந்தானைக் கச்சி ஏகம்பன் தன்னை
மறவாது கழல்நினைந்து வாழ்த்தி ஏத்திப்
புகழ்ந்தாரைப் பொன்னுலகம் ஆள்விப்பானைப்
பூதகணப் படையானைப், புறங்காட்டாடல்
உகந்தானைப், பிச்சையே இச்சிப்பானை
ஒண்பவளத் திரளை, என் உள்ளத்துள்ளே
திகழ்ந்தானைத், திருவானைக்கா உளானைச்
செழுநீர்த் திரளைச் சென்றாடினேனே
(9)
நசையானை, நால்வேதத்தப்பாலானை
நல்குரவு தீப்பிணிநோய் காப்பான் தன்னை
இசையானை, எண்ணிறந்த குணத்தான் தன்னை
இடைமருதும் ஈங்கோயும் நீங்காது ஏற்றின்
மிசையானை, விரிகடலும் மண்ணும் விண்ணும்
மிகுதீயும் புனலெறி காற்றாகி எட்டுத்
திசையானைத், திருவானைக்கா உளானைச்
செழுநீர்த் திரளைச் சென்றாடினேனே
(10)
பார்த்தானைக் காமனுடல் பொடியாய் வீழப்
பண்டயன்மால் இருவர்க்கும் அறியா வண்ணம்
சீர்த்தானைச், செந்தழல்போல் உருவினானைத்
தேவர்கள் தம் பெருமானைத், திறமுன்னாதே
ஆர்த்தோடி மலையெடுத்த இலங்கை வேந்தன்
ஆண்மையெலாம் கெடுத்தவன்தன் இடர் அப்போதே
தீர்த்தானைத், திருவானைக்கா உளானைச்
செழுநீர்த் திரளைச் சென்றாடினேனே
தேவாரத் திருப்பதிகங்களுக்கான பாராயண வலைத்தளம்:
சைவ சமயத்திற்கு அளப்பரிய தொண்டாற்றி வரும் பிரதான வலைத்தளங்களில், தேவாரம் உள்ளிட்ட பன்னிரு திருமுறைகளின் மூலம் பேணிப் பாதுகாக்கப் பெற்று வருக...
