(1)
கறையணி வேலிலர் போலும், கபாலம் தரித்திலர் போலும்
மறையும் நவின்றிலர் போலும், மாசுணம் ஆர்த்திலர் போலும்
பறையும் கரத்திலர் போலும், பாசம் பிடித்திலர் போலும்
பிறையும் சடைக்கிலர் போலும் பிரமபுரம் அமர்ந்தாரே
(2)
கூரம்பது விலர் போலும், கொக்கின் இறகிலர் போலும்
ஆரமும் பூண்டிலர் போலும், ஆமை அணிந்திலர் போலும்
தாரும் சடைக்கிலர் போலும், சண்டிக்கருளிலர் போலும்
பேரும் பலவிலர் போலும் பிரமபுரம் அமர்ந்தாரே
(3)
சித்த வடிவிலர் போலும், தேசம் திரிந்திலர் போலும்
கத்தி வரும் கடுங்காளி கதங்கள் தவிர்த்திலர் போலும்
மெய்த்த நயனம் இடந்தார்க்காழி அளித்திலர் போலும்
பித்த வடிவிலர் போலும் பிரமபுரம் அமர்ந்தாரே
(4)
நச்சரவாட்டிலர் போலும், நஞ்ச மிடற்றிலர் போலும்
கச்சுத் தரித்திலர் போலும், கங்கை தரித்திலர் போலும்
மொய்ச்சவன் பேயிலர் போலும், முப்புரம் எய்திலர் போலும்
பிச்சை இரந்திலர் போலும் பிரமபுரம் அமர்ந்தாரே
(5)
தோடு செவிக்கிலர் போலும், சூலம் பிடித்திலர் போலும்
ஆடு தடக்கை வலிய யானை உரித்திலர் போலும்
ஓடு கரத்திலர் போலும், ஒள்ளழல் கையிலர் போலும்
பீடு மிகுத்தெழு செல்வப் பிரமபுரம் அமர்ந்தாரே
(6)
விண்ணவர் கண்டிலர் போலும், வேள்வி அழித்திலர் போலும்
அண்ணல் அயன்தலை வீழ அன்றும் அறுத்திலர் போலும்
வண்ணம் எலும்பினொடக்கு வடங்கள் தரித்திலர் போலும்
பெண்ணின மொய்த்தெழு பிரமபுரம் அமர்ந்தாரே
(7)
பன்றியின் கொம்பிலர் போலும், பார்த்தற்கருளிலர் போலும்
கன்றிய காலனை வீழக் கால்கொடு பாய்ந்திலர் போலும்
துன்று பிணஞ்சுடு காட்டில் ஆடித் துதைந்திலர் போலும்
பின்றியும் பீடும் பெருகும் பிரமபுரம் அமர்ந்தாரே
(8)
பரசு தரித்திலர் போலும், படுதலை பூண்டிலர் போலும்
அரசன் இலங்கையர் கோனை அன்றும் அடர்த்திலர் போலும்
புரைசெய் புனத்திள மானும் புலியின் அதளிலர் போலும்
பிரச மலர்ப்பொழில் சூழ்ந்த பிரமபுரம் அமர்ந்தாரே
(9)
அடிமுடி மாலயன் தேட அன்றும் அளப்பிலர் போலும்
கடிமலர் ஐங்கணை வேளைக் கனல விழித்திலர் போலும்
படிமலர்ப் பாலனுக்காகப் பாற்கடல் ஈந்திலர் போலும்
பிடிநடை மாதர் பெருகும் பிரமபுரம் அமர்ந்தாரே
(10)
வெற்றரைச் சீவரத்தார்க்கு வெளிப்பட நின்றிலர் போலும்
அற்றவர் ஆனிழல் நால்வர்க்கறங்கள் உரைத்திலர் போலும்
உற்றலர் ஒன்றிலர் போலும் ஓடு முடிக்கிலர் போலும்
பெற்றமும் ஊர்ந்திலர் போலும் பிரமபுரம் அமர்ந்தாரே
(11)
பெண்ணுரு ஆணுரு அல்லாப் பிரமபுர நகர் மேய
அண்ணல் செய்யாதன எல்லாம் அறிந்து வகைவகையாலே
நண்ணிய ஞானசம்பந்தன் நவின்றன பத்தும் வல்லார்கள்
விண்ணவரோடினிதாக வீற்றிருப்பார் அவர் தாமே
தேவாரத் திருப்பதிகங்களுக்கான பாராயண வலைத்தளம்:
சைவ சமயத்திற்கு அளப்பரிய தொண்டாற்றி வரும் பிரதான வலைத்தளங்களில், தேவாரம் உள்ளிட்ட பன்னிரு திருமுறைகளின் மூலம் பேணிப் பாதுகாக்கப் பெற்று வருக...
