(1)
ஆராரும் மூவிலைவேல் அங்கையானை
அலைகடல் நஞ்சயின்றானை, அமரர் ஏத்தும்
ஏராரும் மதிபொதியும் சடையினானை
எழுபிறப்பும் எனைஆளா உடையான் தன்னை
ஊராரும் படநாகம் ஆட்டுவானை
உயர்புகழ் சேர்தரும் ஓமாம்புலியூர் மன்னும்
சீராரும் வடதளிஎம் செல்வன் தன்னைச்
சேராதே திகைத்துநாள் செலுத்தினேனே
(2)
ஆதியான் அரிஅயன் என்றறியஒண்ணா
அமரர்தொழும் கழலானை, அமலன் தன்னைச்
சோதிமதி கலைதொலையத் தக்கன் எச்சன்
சுடர்இரவி அயிலெயிறு தொலைவித்தானை
ஓதிமிக அந்தணர்கள் எரிமூன்றோம்பும்
உயர்புகழார் தரும் ஓமாம்புலியூர் மன்னும்
தீதில்திரு வடதளிஎம் செல்வன் தன்னைச்
சேராதே திகைத்துநாள் செலுத்தினேனே
(3)
வருமிக்க மதயானை உரித்தான் தன்னை
வானவர்கோன் தோளனைத்தும் மடிவித்தானைத்
தருமிக்க குழலுமையாள் பாகன் தன்னைச்
சங்கரன்எம் பெருமானைத், தரணி தன்மேல்
உருமிக்க மணிமாடம் நிலாவு வீதி
உத்தமர் வாழ்தரும் ஓமாம்புலியூர் மன்னும்
திருமிக்க வடதளிஎம் செல்வன் தன்னைச்
சேராதே திகைத்துநாள் செலுத்தினேனே
(4)
அன்றினவர் புரமூன்றும் பொடியாய் வேவ
அழல்விழித்த கண்ணானை, அமரர் கோனை
வென்றிமிகு காலனுயிர் பொன்றி வீழ
விளங்கு திருவடி எடுத்த விகிர்தன் தன்னை
ஒன்றியசீர் இருபிறப்பர் முத்தீயோம்பும்
உயர்புகழ் நான்மறை ஓமாம்புலியூர் நாளும்
தென்றல்மலி வடதளிஎம் செல்வன் தன்னைச்
சேராதே திகைத்துநாள் செலுத்தினேனே
(5)
பாங்குடைய எழிலங்கி அருச்சனைமுன் விரும்பப்
பரிந்தவனுக்கருள் செய்த பரமன் தன்னைப்
பாங்கிலா நரகதனைத் தொண்டரானார்
பாராத வகை பண்ண வல்லான் தன்னை
ஓங்குமதில் புடைதழுவும் எழில் ஓமாம்புலியூர்
உயர்புகழ் அந்தணரேத்த, உலகர்க்கென்றும்
தீங்கில்திரு வடதளிஎம் செல்வன் தன்னைச்
சேராதே திகைத்துநாள் செலுத்தினேனே
(6)
அருந்தவத்தோர் தொழுதேத்தும் அம்மான் தன்னை
ஆராத இன்னமுதை, அடியார் தம்மேல்
வருந்துயரம் தவிர்ப்பானை, உமையாள் நங்கை
மணவாள நம்பியை, என்மருந்து தன்னைப்
பொருந்துபுனல் தழுவுவயல் நிலவு துங்கப்
பொழில்கெழுவு தரும் ஓமாம்புலியூர் நாளும்
திருந்துதிரு வடதளிஎம் செல்வன் தன்னைச்
சேராதே திகைத்துநாள் செலுத்தினேனே
(7)
மலையானை, வருமலை ஒன்றுரி செய்தானை
மறையானை, மறையாலும் அறியவொண்ணாக்
கலையானைக், கலையாரும் கையினானைக்
கடிவானை அடியார்கள் துயரமெல்லாம்
உலையாத அந்தணர்கள் வாழும் ஓமாம்
புலியூர்எம் உத்தமனைப், புரம் மூன்றெய்த
சிலையானை, வடதளிஎம் செல்வன் தன்னைச்
சேராதே திகைத்துநாள் செலுத்தினேனே
(8)
சேர்ந்தோடு மணிக்கங்கை சூடினானைச்
செழுமதியும் படஅரவும் உடன் வைத்தானைச்
சார்ந்தோர்கட்கு இனியானைத், தன்னொப்பில்லாத்
தழலுருவைத், தலைமகனைத், தகை நால்வேதம்
ஓர்ந்தோதிப் பயில்வார் வாழ்தரும் ஓமாம்புலியூர்
உள்ளானைக், கள்ளாத அடியார் நெஞ்சில்
சேர்ந்தானை, வடதளிஎம் செல்வன் தன்னைச்
சேராதே திகைத்துநாள் செலுத்தினேனே
(9)
…
(10)
வார்கெழுவு முலைஉமையாள் வெருவ அன்று
மலையெடுத்த வாளரக்கன் தோளும் தாளும்
ஏர்கெழுவு சிரம்பத்தும் இறுத்து மீண்டே
இன்னிசை கேட்டிருந்தானை, இமையோர் கோனைப்
பார்கெழுவு புகழ்மறையோர் பயிலும் மாடப்
பைம்பொழில் சேர்தரும் ஓமாம்புலியூர் மன்னும்
சீர்கெழுவு வடதளியெம் செல்வன் தன்னைச்
சேராதே திகைத்துநாள் செலுத்தினேனே
தேவாரத் திருப்பதிகங்களுக்கான பாராயண வலைத்தளம்:
சைவ சமயத்திற்கு அளப்பரிய தொண்டாற்றி வரும் பிரதான வலைத்தளங்களில், தேவாரம் உள்ளிட்ட பன்னிரு திருமுறைகளின் மூலம் பேணிப் பாதுகாக்கப் பெற்று வருக...
